قروي تدعوه شابة جميلة لعيد ميلادها

قروي تدعوه شابه جميله لحضور عيد ميلادها
و هو إنسان لا يفقه شيئا بأعياد الميلاد
و ها هو يتحدث لنا عن هذه المغامرة بنفسه فلننظر ماذا حدث ...


وأنا من زمنآ خدو مشلخ وهي من أزمانآ خدها ساده
إتعجبت سماحها مواتر طبقات عاليه وكلها ساده
وكانت بيننا فوارق شاسعه إتعارفنا و كانت جاده
قالت : عيد ميلادي الشهر الجايي و لازم تحضر
وقلت لا : خير
و دخل في أضافري بتقصد إيه بي عيد ميلادا
أ يآ ربي إتولدت يا دابه
إبقي الأعياد سوها زياده
إمكن ولدت وأنا ما عارف وإمكن ميلاد عيسي وأجداده
أ يآ ربي بدقوا الدلوكه و بعزموا الحلال كالعاده
و بس قت لا خير وأنا جاييكم وعديله و زين
والشهر الجايي مرق مركوبي من السحاره داقاهو المطره قبل شهرين
و نقط طاقيتي من العضاضه دليت مسمار رقعتها زين
سديريتي أبوي مسويها لبد فرتقت اللبده مرقتها طين
عراقي مغزوز في الكوكار كان سوهو وقاية وكت فازعين
سروال مدفوس في رحل العيش ملفوف محشور بين شوالين
لميتهن و أديتن شطفه و شريتن فوق لي زريبة الزين
و الزين بقراتو مكوفرات تب مضغن طاقيتي هرنها زين
شافتن السره بت الهراف طردتهن جابتهن لتاف
وغضبت غضب و عزمت أقول : جفن ما جفن وأقوم في الحين
مرقت و وشي مطوطو تب
وصتني الحله رجال و عوين
وصتني أم نوفل لي كركار كان تلقي ودك جيب لي رطلين
و قروشا حلف صره و بي خيط وصتني حليمه بت العجبين
سروال لي أمحمد و رطلين بن بنبيع لنا شاه و نديك بعدين
والناس بتوصي و غبيانا
و الناس غبيانا و بتوصي

و لقيت الحوش مزرود لا حدو بنات سمحات
شايلات هدايات واحدات وردات واحدات زهرات
شايلات رسمات في شكل أرنوب واحدات كدوس وأسود و نمور سبحان الله زي الميتات
وأنا جيت بي إيدي ما عارف شي شايلي ألفين داير أكتبهن في الدفتر جت وأنا زول واجبات
والناس ملخومه ومربوشه يتضاحكوا قررر
حايشين صينيه تزق شمعات
مافي زولآ قال لي إنت منو ما بعرفوا الضيف زي الخواجات
وأنا كت راجي الدلوكه تدق لكين اللوم بجي بالهفوات
لتيت عكازي وقفت طرف ملص نعلاتي إتفرجخت لي تفه خلالي مضنقلو تب سكيني ملسنه بالجمبات
تمباكي وحقتي مزروده ولعت كدوسي وأخد جبدات
وأنا بتأمل هذا العالم ياتو البنوت و ياتو الجنيات

و الأروع في هذي الظيطه ما عرف أصلآ زولتي الجيتها
بحرت عيني لامن برقن كل البنوت زيها سمحات
والبقر إتشابه لي ضمه ما عرفت الفاتن والجايات
لي حسن الحظ هي النقرتني ماشالت شك من شافتني شاقتني و قامت بالواجب هي أصيله وطيبه وست حوبات
نادت صاحباتها بنتعارف

ناندي و نانسي و عفراء و حوراء ولمياء و شيماء ... و كفي
- من وين ؟
- من لندن جينا أمس .. راجعين باكر زي هاللحظه .
من الطايف والمنشية ومدينة النيل و بلود راقيات طيبات طيبه و كل كليمه معاها ضحيكه و نضااااااااف و رهاااااااف زي اللعبات
واحدة فيهن سمحه سماح لكين مي طاعمه وأنا زول مستغرب في حاجات
أنا زول آسراني سماحة قاسيه بت البلد الثابته وراسيه .. سماح التايه الماهو ملفق وماهو مزين بي كريمات
وهسع هن نهشني يساءلن : عرف نفسك بي عبارات
إت ياتك ؟
من يات كوكب ؟
من يات ساده .. وإستايلك زاتو خرب للعاده
قت ليهن :
أنا اللسد الحرس غابتو الضريه
وأنا الساعة الكتال بختف حديه
أنا الدراق عدوي طابقلو كيه
وأنا الزايرني ما بجيب لي هديه
وساكن مفسح أم هبج السخيه
مراتع ألبل الضان السعيه
مهنتي مجالس الدرجه الجديه
وأدرج عاطلة الرقبه السبيه



[right]

التحية لك الأخ قاسم والتحية لشاعر البطانة (البشرى) على هذه التحفة الرائعة ويا حليل الزمن الخدو مشلخ!!! الهمباتي